KILIMO BORA CHA MIHOGO

Muhogo ni moja ya mazao ya mizizi ambayo ni muhimu sana kwa chakula nchini. Umuhimu wake unatokana na uwezo wake wa kustawi na kutoa mavuno ya kuridhisha katika mazingira ya ukame na udongo usiokuwa na rutuba nyingi ambapo mazao mengine yasingeweza kustawi. Hustawi katika sehemu nyingi, hasa, za ukanda wa chini na miinuko ya kadiri.Aidha, ni chakula kikuu cha zaidi ya watu milioni 300 duniani na mamilioni ya mifugo. Wanga unaotokana na zao hili una matumizi mengi. Kuna viwanda vingi duniani ambavyo hutumia muhogo kutengeneza bidhaa mbalimbali. Viwanda hivyo huajiri maelfu ya watu. Kwa upande mwingine, huko nyuma zao hili lilijulikana kama zao la watu fukara na halikufanyiwa utafiti wa kutosha. Hata hivyo, katika miaka ya hivi karibuni wataalamu wamegundua mambo matatu muhimu sana kuhusiana na zao hili: kwanza, ukiondoa miwa, ni zao pekee linalotoa wanga mwingi zaidi kutoka hekta (au sehemu yake) moja ya ardhi kuliko zao lingine. Pili, ni zao linalovumilia ukame. Tatu, lina wadudu na magonjwa machache ukilinganisha na mazao ya nafaka. Kwa mfano, mimea ya muhogo haishambuliwi na nzige. Kwa hiyo, kama balaa la nzige likitokea, wakulima wataponea kwenye mashamba ya muhogo wakati mazao mengine yatakuwa yameteketezwa na wadudu hao.